📰 கொழும்பு துறைமுகத்தில் கிழக்கு கொள்கலன் முனையத்தின் இரண்டாம் கட்ட நிர்மாணப்பணிகள் ஆரம்பிக்கப்பட்டுள்ளன

அடுத்த மூன்று ஆண்டுகளுக்கு நம்பிக்கையுடன் இருங்கள்…பிரதமர்

கொழும்பு துறைமுகத்தில் கிழக்கு கொள்கலன் முனையத்தின் இரண்டாம் கட்ட நிர்மாணப் பணிகள் ஜனாதிபதி கோட்டாபய ராஜபக்ஷ மற்றும் பிரதமர் மஹிந்த ராஜபக்ஷ தலைமையில் ஜனவரி 12 ஆம் திகதி ஆரம்பமானது.

முனையத்தின் நிர்மாணப் பணிகளை ஆரம்பித்து வைக்கும் பலகையை ஜனாதிபதி மற்றும் பிரதமர் திறந்து வைத்தனர்.

மூன்று கட்டங்களாக நடத்தப்படும் முனையத்தின் கட்டுமானப் பணிகள் 2024 இல் முடிக்க திட்டமிடப்பட்டுள்ளது. 75 ஹெக்டேர் பரப்பளவில் அமைந்துள்ள முனையம் 1,320 மீட்டர் நீளம் கொண்டது. பூர்த்தி செய்யப்பட்டவுடன், இலங்கை துறைமுக அதிகாரசபையானது (SLPA) 12 STC கிரேன்கள் மற்றும் 40 Rail Mounted Gantry (RMG) கிரேன்கள் ஆகியவற்றைக் கையாளும் ஒரு முழுமையான முனையத்தை மரபுரிமையாகப் பெறும். இத்திட்டத்திற்காக மொத்தமாக 510 மில்லியன் அமெரிக்க டொலர்கள் செலவிடப்படவுள்ளதுடன் துறைமுக அதிகாரசபை 200 மில்லியன் அமெரிக்க டொலர்களை செலவிடவுள்ளது.

அக்சஸ் இன்ஜினியரிங் பிஎல்சி மற்றும் சைனா ஹார்பர் இன்ஜினியரிங் கம்பெனி லிமிடெட் ஆகியவை இணைந்து கட்டுமானங்களை மேற்கொள்கின்றன.

கூட்டத்தில் உரையாற்றிய பிரதமர் மஹிந்த ராஜபக்ஷ, COVID-19 தொற்றுநோயால் இழந்த கடந்த இரண்டு வருடங்கள் குறித்து சிந்திக்க வேண்டாம் என்றும் அதற்குப் பதிலாக அடுத்த மூன்று ஆண்டுகளுக்கு நம்பிக்கையை வைத்திருக்குமாறும் மக்களுக்கு அழைப்பு விடுத்தார். கடந்த காலம் எதிர்க்கட்சிகளுக்கு மட்டுமே மதிப்பு. நாம் எப்போதும் எதிர்காலத்தைத் தழுவ வேண்டும், கடந்த காலத்தை அல்ல.

நாட்டைப் பற்றிய நம்பிக்கைகளையோ அல்லது நம்பிக்கையான எண்ணங்களையோ யாரும் விட்டுவிடக் கூடாது என்றும், கடந்த இரண்டு ஆண்டுகளை விமர்சகர்களுக்கு விட்டுவிட்டு, எதிர்காலத்தை நாம் தழுவிக்கொள்ள வேண்டும் என்றும் பிரதமர் கூறினார்.

Alphaliner’s Ports தரவரிசையின் படி கொழும்பு துறைமுகம் தற்போது உலகில் 23வது இடத்தில் உள்ளது. புதிய அபிவிருத்திப் பணிகள் நிறைவடைந்ததன் பின்னர் துறைமுகம் 13வது இடத்தைப் பெறும் என அமைச்சர் ரோஹித அபேகுணவர்தன தெரிவித்தார்.

இந்நிகழ்வில் மகாசங்கத்தினர், ஏனைய சமயத் தலைவர்கள், அமைச்சரவை மற்றும் அரச அமைச்சர்கள், ஆளுநர்கள், தூதுவர்கள், பாராளுமன்ற உறுப்பினர்கள், மக்கள் பிரதிநிதிகள் மற்றும் அரச அதிகாரிகள் எனப் பலரும் கலந்துகொண்டனர்.