Sri Lanka

📰 புனரமைக்கப்பட்ட ‘சிறிமதிபாய’ பிரதமர் அலுவலகம் ஜனாதிபதி மற்றும் பிரதமர் தலைமையில் திறந்து வைக்கப்பட்டது

கொழும்பு மலர் வீதியில் புனரமைக்கப்பட்ட ‘சிறிமதிபாய’ பிரதமர் அலுவலகம் ஜனவரி (20) ஜனாதிபதி கோட்டாபய ராஜபக்ஷ மற்றும் பிரதமர் மஹிந்த ராஜபக்ஷவினால் திறந்து வைக்கப்பட்டது.

பலகையை திரைநீக்கம் செய்த ஜனாதிபதி, அலுவலக வளாகத்திலுள்ள புத்தர் சிலைக்கு மலர்வணக்கம் செலுத்தி கடமைகளை ஆரம்பித்து வைத்தார்.

புனரமைக்கப்பட்ட அலுவலகத்தில் காட்சிப்படுத்தப்பட்டுள்ள புகைப்படங்களை பார்வையிட்ட ஜனாதிபதி, அலுவலக வளாகத்தையும் பார்வையிட்டார். ஜனாதிபதியின் தலைமையில் புதிய அலுவலகத்தின் கடமைகளை ஆரம்பித்து வைக்கும் வகையில் முதல் நாள் அட்டை மற்றும் நினைவு தபால் தலை ஒன்றும் வெளியிடப்பட்டது.

பிரதமர் மஹிந்த ராஜபக்ஷவின் தொலைநோக்குப் பார்வைக்கு அமைவாக முன்னாள் பிரதமரின் செயலாளர் காமினி செனரத்தின் மேற்பார்வையில் இலங்கை கடற்படையினர் இக்கட்டடத்தை புனரமைத்துள்ளனர்.

இந்த இரண்டு மாடி மாளிகையானது ஆல்பர்ட் இம்மானுவேல் டி சில்வாவால் 1916 ஆம் ஆண்டு அவரது மகன் சர் ஆல்பர்ட் ஏர்னஸ்ட் டி சில்வாவிற்காக கட்டப்பட்டது. சேர் ஏர்னஸ்ட் டி சில்வாவின் மறைவைத் தொடர்ந்து 1960 ஆம் ஆண்டு குடும்ப உறுப்பினர்களால் இந்த மாளிகை அரசிடம் ஒப்படைக்கப்பட்டது.

கல்வி மற்றும் ஒலிபரப்பு அமைச்சு மற்றும் உள்ளூராட்சி, வீடமைப்பு மற்றும் நிர்மாண அமைச்சு பின்னர் சிறிமதிபாயவில் நிறுவப்பட்டது. 1978 ஆம் ஆண்டு அப்போதைய பிரதமர் ரணசிங்க பிரேமதாச சிறிமதிபாயவில் பிரதமர் அலுவலகத்தை நிறுவினார்.

நூறு வருடங்களுக்கு மேல் பழைமை வாய்ந்த சிறிமதிபாய 44 வருடங்களின் பின்னர் பூரண புனரமைப்புக்கு உட்பட்டுள்ளது.

சிறிமதிபாயவின் வரலாறு மற்றும் புகைப்படங்கள் அடங்கிய புத்தகம் ஜனாதிபதியின் செயலாளர் காமினி செனரத் அவர்களினால் ஜனாதிபதியிடம் கையளிக்கப்பட்டது.

புனரமைக்கப்பட்ட பிரதமர் அலுவலகத்தின் திறப்பு விழாவைக் குறிக்கும் வகையில், முன்னாள் பிரதமர்களின் செயலாளர்களுடன் ஜனாதிபதி புகைப்படத்திற்கு போஸ் கொடுத்தார். விசேட அதிதிகளுக்காக புத்தகத்தில் குறிப்பு ஒன்றையும் ஜனாதிபதி விட்டுச்சென்றார்.

அமைச்சர் டலஸ் அழகப்பெரும, இராஜாங்க அமைச்சர் விதுர விக்கிரமநாயக்க, ஜனாதிபதியின் செயலாளர் காமினி செனரத், ஜனாதிபதியின் பிரதான ஆலோசகர் லலித் வீரதுங்க, பிரதமரின் செயலாளர் அனுர திஸாநாயக்க, முன்னாள் பிரதமர்களின் செயலாளர்கள், அரச அதிகாரிகள் மற்றும் அல்பேர்ட் ஏர்னஸ்ட் டி சில்வாவின் உறவினர்களும் கலந்துகொண்டனர். .

பிஎம்டி

Leave a Reply

Your email address will not be published.